பிரபல இயக்குநர் வி. சேகர் காலமானார்

குடும்பப் பாங்கான திரைப்படங்களை இயக்கி மக்கள் மனதில் நீங்கா இடம் பிடித்த பிரபல இயக்குநர் வி. சேகர் அவர்கள் நேற்று (நவம்பர் 14, 2025) தனது 73 வது வயதில் காலமானார். உடல்நலக் குறைவு காரணமாக கடந்த இரு வாரங்களுக்கும் மேலாக மருத்துவமனையில் சிகிச்சை பெற்று வந்த அவர், சிகிச்சை பலனின்றி உயிர் இழந்தார். கடந்த 10 நாட்களாக தீவிர சிகிச்சை பிரிவில் இருந்த அவரது மறைவு, தமிழ் திரையுலகினரையும், அவரது ரசிகர்களையும் பெரும் சோகத்தில் ஆழ்த்தியுள்ளது.

தமிழ் சினிமாவுக்குக் குடும்பக் கதைகள் என்ற புதிய பாணியை அறிமுகப்படுத்தியதில் வி. சேகருக்கு முக்கிய பங்கு உண்டு. நடுத்தர வர்க்கக் குடும்பங்களின் அன்றாடப் பிரச்சினைகளையும், உணர்வுகளையும் நகைச்சுவை கலந்து தனது படங்களில் அழகாகக் காட்சிப்படுத்தியவர்.

அவரது இயக்கத்தில் வெளிவந்த விரலுக்கேத்த வீக்கம், கூடி வாழ்ந்தால் கோடி நன்மை, வரவு எட்டணா செலவு பத்தணா, காலம் மாறிப் போச்சு, நான் புடிச்ச மாப்பிள்ளை போன்ற படங்கள் இன்றும் பலராலும் கொண்டாடப்படும் காலத்தால் அழியாத குடும்பத் திரைப்படங்களாக உள்ளன.

அவரது மறைவுக்குத் திரையுலகைச் சேர்ந்த பலரும், அரசியல் தலைவர்களும், ரசிகர்களும் சமூக வலைத்தளங்களில் தங்கள் ஆழ்ந்த இரங்கலைத் தெரிவித்து வருகின்றனர். குடும்பங்களின் இயக்குநர் என்று போற்றப்பட்ட வி. சேகரின் இழப்பு, தமிழ் சினிமாவுக்கு ஈடு செய்ய முடியாத பேரிழப்பாகும்.