ரஜினியின் 173 வது படத்திலிருந்து சுந்தர்.C விலகல்

சூப்பர்ஸ்டார் ரஜினிகாந்த் அவர்களின் 173-வது திரைப்படத்தை (Thalaivar 173) இயக்குநர் சுந்தர்.சி இயக்கவிருந்த நிலையில், தற்போது அவர் அந்தத் திட்டத்தில் இருந்து விலகுவதாக அறிவித்திருப்பது கோலிவுட்டில் பெரும் பரபரப்பை ஏற்படுத்தியுள்ளது. இந்தத் திரைப்படம் கமல்ஹாசனின் ராஜ் கமல் ஃபிலிம்ஸ் இன்டர்நேஷனல்  தயாரிப்பில் உருவாகவிருந்தது குறிப்பிடத்தக்கது.

படத்தின் அதிகாரப்பூர்வ அறிவிப்பு வெளியாகி ரசிகர்கள் மத்தியில் பெரும் எதிர்பார்ப்பை ஏற்படுத்தியிருந்த நிலையில், சுந்தர்.சி தனது சமூக வலைத்தளப் பக்கத்தில் ஒரு அறிக்கையை வெளியிட்டுள்ளார். தவிர்க்க முடியாத மற்றும் எதிர்பாராத சூழ்நிலைகள் காரணமாக இந்த மதிப்புமிக்க படத்தில் இருந்து விலகும் கடினமான முடிவை எடுத்துள்ளேன், என்று அவர் குறிப்பிட்டுள்ளார்.

மேலும், ரஜினிகாந்த் மற்றும் கமல்ஹாசன் ஆகியோருடன் இணைந்து பணியாற்றுவது தனது கனவு என்று அவர் தெரிவித்திருந்தாலும், வாழ்க்கையில் சில சமயங்களில் கனவுகளை விட விதிக்கப்பட்ட பாதையைப் பின்பற்ற வேண்டியிருக்கும் என்றும், இவர்களது அறிவுரையும் ஊக்கமும் தனக்கு எப்போதும் வழிகாட்டியாக இருக்கும் என்றும் குறிப்பிட்டுள்ளார்.

சுந்தர்.சி-யின் விலகலைத் தொடர்ந்து, ரஜினிகாந்தின் 173-வது படத்தை இயக்கப்போவது யார் என்ற கேள்வி தற்போது ரசிகர்கள் மத்தியிலும் சினிமா வட்டாரத்திலும் பெரும் பேசுபொருளாகியுள்ளது. புதிய இயக்குநரை நியமிக்கும் பணியில் ராஜ் கமல் ஃபிலிம்ஸ் இன்டர்நேஷனல் மும்முரமாக இருப்பதாக தகவல்கள் தெரிவிக்கின்றன.

இதற்கிடையில், ரஜினியுடன் ஏற்கனவே பேட்ட போன்ற வெற்றிப் படத்தைக் கொடுத்த இயக்குநர் கார்த்திக் சுப்பராஜ் இந்தப் படத்தை இயக்கக்கூடும் என்ற தகவல் சமூக வலைத்தளங்களில் வேகமாகப் பரவி வருகிறது. இருப்பினும், இதுவரையில் ராஜ் கமல் ஃபிலிம்ஸ் இன்டர்நேஷனல் நிறுவனம் தரப்பிலிருந்து புதிய இயக்குநர் குறித்து எந்தவொரு அதிகாரப்பூர்வ அறிவிப்பும் வெளியாகவில்லை.